+0 به‌ین
مش اسماعیل نئجه پان توركیست اولدو؟
دوكتور جئری
مش اسماعیلی محلله ده هامی تانیر. سحر آلا قارانلیقدان ائودن چیخیب آخشام قاش قارالاندا ائوینه قاییدار. اوزون ایللردیر، اسكیمیش یوك ماشینیلا بیرگه روزگارین ایستی- سویوغونو، چؤل - باییردا چكمكده دیر. ایندی اونو یالنیز تویلاردا توی بیگی ، یاسلاردا ایسه چای-سماور تزگاهی نین دولاندیریجیسی كیمی گؤرمك اولور آنجاق كئچمیشده، یایی بیر نئچه سفر قاپی قونشونو ماشینینا دولدوروب اورمو گؤلونه آپاراردی. اورمو گؤلو مش اسماعیلین هر شئی ایدی. اوزمكدن دویمازدی . یورولاندا ایسه زیغ- چامورا قویلانیب شیرین خاطیره لریندن دانیشیب گولدورردی؛ هردنسه اوخویوب هامینی شنلندیره ردی.
مش اسماعیل بؤیوك-كیچیگین سئویملیسی دیر محلله ده . بونا گؤره اونون توتولما خبری هامینی سارسیتدی. محلله یه ولوله دوشدو. دئییلنلره گؤره، مش اسماعیل پان توركیست لیك اتیهامینا گؤره یاخالانیب آدی یوخ ایداره سینه آپاریلمیشدی. مش اسماعیلی ائشیگه چیخارتماق اوچون آغ ساققاللار سفربر اولدو. اولمایان- قالمایان یئرلره باش وورولدو. بو چابالامالار بیر آی سونرا سونوجلانیب مش اسماعیل یوز الی میلیونلوق وثیقه ایله آزاد اولدو. بیر قوطو شیرینی باغلاییب شامدان سونرا آتاملا گؤروشنه گئتدیك. ماراقدان ایچیم ایچیمی یئییردی. گؤره سن مش اسماعیلی نه اوچون توتموشدولار؟ بیلدیری می داغیدیب ؟ كیتاب- درگی می یاییب ؟ یووو..خ ، مش اسماعیل آدینی زورلا یازیر ! بو اولا بیلمز. كامیونچولوغودا تراختورچولوغونون گونوسودور! اولمایا اورمو گؤلونه گؤره بیر شئی دانیشیبدا الینه ایش وئریب؟ هه! بئله اولمالی دیر. آناسی نین قیرخیندا سؤز اورمو گؤلونون قوروماسیندا دوشنده او ، "اورمو گؤلونون قورماسی آنامین اؤلوموندن منه آغیر گلیر " دئمیشدی. بو فیكرلره مش اسماعیل ائوینه یئتیشدیك. اوتاق قوهوم- قونشو ایله دولو ایدی. ایچری گئچدیكده ، مش اسماعیل آیاغا قالخیب بیزایله اؤپوشوب گؤروشدو. ساتاشاراق:- مش اسماعیل، ماشاآللاه بتر كؤكلمیسشن!- دئدیم.
قیققیلدایا- قیققیلدایا:- "یوخ بابا ، كؤكه لن یئرین آدی زیندان دیر؛ من گئدن یئرده آدام آریقلار، گؤمورسن تومان اگنیمدن دوشور!" دئدی. هامی گولوشدو.
شیرنیلر یئییلدی. چایلار ایچیلدی. قوناقلارین بیری، " مش اسماعیل نئجه اولدو توتولدوز؟" دئینجه مش اسماعیلین آلنی قیریشلاندی. سیگاری نین كؤتویونو كول قابینا باساراق ،"هامینی برق توتاندا بیزیده جین چیراغی توتدو" دئیه سؤزه باشلادی مش اسماعیل: - او گون ناهار چاغی آریغین-یورغون ائوه گلیردیم خیاباندا آغیر تیخاج وار ایدی. ماشینلار یاواش- یاواش گئدیردیلر. قاباغیمداكی پرشیا ماشینی بیردن تورموزا باسینجا دالدان اونا توخوندوم. آشاغی آتلاندیم. ائله بیر شئی اولمامیشدی. پرشیاداكی لاردا ائندیلر. دؤرد گنج اوغلان ایدیلار. ساغ الیمی دوشومه قویوب بیر آز اگیله رك:- باغیشلایین تقصیر منده ایدی، خسارتیز نئچه اولسا حاضیرام وئریم- دئدیم. كئچی ساققاللی پرشیانین سوروجوسو حیرصلی – حیرصلی قیشقیردی:
- ای بر پدرت لعنت افراسیاب!
" ائله بیل ،منی بیر آیریسی ایله یانلیش توتموش " دئدیم اؤز- اؤزومه سونرا:
ببخشید آغا من افراسیاب نیستم ایسمی من مش اسماعیل است.
گئچی ساققال اوغلان سایمازیانا :
- تورو نمی گم جد اعلایتونو می گم – دئدی سونرا دا بیر ایكی دنه كیفیر سؤز افراسیابین بؤیرونه دوگونله دی.
چاش- باش قالمیشدیم. اوغلانین نه دئدیگینی ایچ ائله یه بیلمیردیم. بیرآز دوشوندوم . بیردن هیندی فیلیم لرده كی كیمی قاییتدیم اوتوز- اوتوزبئش ایل قاباغا. شاه زامانی، اورمو رادیوسوندا شاكری آدلی بیریسی هر آخشام شاهنامه نین ناغیللارینی دئیردی. بو ناغیللاری چوخ خوشلادیغیمدان هر گون اونلارا قولاق آساردیم. بیردن سانكی یاتمیش ایدیم ، اویاندیم. بو ناغیللاردا افراسیاب توركلرین شاهی، بؤیوگو ایدی. بونو خاطیرلایینجا قانیم بئنیمه داشلاندی. گؤزلریمی یوموب آغزیمی آچدیم:
- اولان روستمین آغزینی...
اونون آروادینی ...
اونون دده سی نین سومویونو....
سهرابین قانینا ایشیییم، اونون نوشداروسونا سیچیم...
گنجلر یامانلاری ائشیدجك اوستومه یومولدولار.فیرلانان یومورق اولدو آتیلان تپیك. مامورلار اوزومه بیبرلی اسپری فیشقیراندا اؤزومه گلدیم. یولدان گئچنلر، دؤرد فارسین بیر یاشلی توركله ووروشدوغونوگؤرونجه ساواشا قاتیشاراق گنج لری دؤیوب پرشیانی دارما- داغین ائتمیشدیلر. بیزی پولیس ایداره سینه آپاردیلار.گتیرمزلیك دن پولیس ایداره سی نین رئیسی، روستم و گنج لرله همشهری چیخدی! نه باشیزی آغریدیم. پولیس ایداره سینده حلل اولا بیلن پرونده نی، "بو موضویا یئتیشمك بیزیم صلاحیبتیمیزده دئییل" دئیه آدی یوخ ایداره سینه گؤندردیلر....
مش اسماعیل یئنه سیگار آلیشدیردی. قوناقلارین بیری دؤزمه ییب، " اورادا نه اولدو؟" دئیه سوروشدو. مش اسماعیل توستونو بورنون دلیكلریندن ائیشیگه بورولایاراق سؤزونون آردینی توتدو:
- هئچ اورادا پوخو قویدوق سبده. مملكتده، توركلرله فارسلارین آراسینی وورماق ، ایغتیشاش سالماق گوناهینی، بیلدیگیز كیمی بوینوما قویدولار، خولاصه پان توركیست دئییلن شئیین كوت - شالوارینی اگنیمه بیچدیلر. یولداشلار ساغ اولسونلار اونلارین كؤمگی ایله ضامینه بوراخیلدیم. پرونده نی دادیگاها گؤنده ره جكلر. گؤره ك دادیگاه نه حوكم وئریر. هله هله گؤزله ملی ییك...
واخت گئچمیشدی. قوناقلار آیاغا قالخیب دیل-آغیز ائده رك مش اسماعیل لا ساغ اوللاشدیلار. هامیدان سونرا من چیخدیم . قاپی آغزیندا مش اسماعیل دان سوروشدوم:
- مش اسماعیل بو آرادا گوناهلی كیمدیر؛ نییه باشیمیزا بو اویونلار گلیر؟
مش اسماعیل الینی چیگنیمه قویوب گولومسه یرك دئدی:
- گوناهلارین هامیسی سازمانی میللین بوینونا دیر! چومچه قازانا دگنده بو كؤپك اوغلولار تئز بیر قطعنامه چیخاردیرلار آنجاق نئچه مین ایللیك ایران - توران ساواشینا بیرجه دنه بئله اولسون قطعنامه صادیر ائله مه ییب لر هم بیزیم جانیمیز قورتولسون هم بو فارسلارین!
1391/1/14
بؤلوم: حیكایه و گولمه‌جه‌لر
+0 به‌ین
دؤولتی پورتاغال!
اوشاقلاری نین هئچ یامان اؤیرنمه سینی ایسته مه ین بیر آنا، اوغلونو بازارا گؤندرمیش. بو سیرادا، بلدیه مامورلاری ایله ال آراباسی اوستونده آیین- اویون ساتانلارین آراسیندا توققوشما چیخیب رنگلی- رنگلی یامانلار آلیش وئریش اولموش.اوغول ائوه دؤنونجه آناسیندان سوروشموش:
- آنا ...یك نه دئمك دیر؟
آناسی :- پورتاغال اوغلوم پورتاغال ! - دئمیش.
بایرام اولموش.قوناقلارین باشی آچیلمیش. آنا اوغلونا :- اوغلوم دور قوناقلاریمیزا میوه توت – دئمیش. اوغلان ، میوه قابینی قوناقلارین قاباغیندا توتاراق:
- دؤولتی ...یك لردن یئین ، همی شیرین همی سولودورلار!
اخلاقی سونوج: بو ایل "دؤولت قیمت لره نظارت ائده جك" وعده سیله میللته یاخشی پورتاغال ووردو!
شور گؤز قوناق!
بایرام قوناغی گئدندن سونرا، آرواد حیرصله اریندن سوروشموش:
- بو گلن كیم ایدی؟ آز قالیردی گؤزلری ایله آنامی یئسین؟
كیشی گولومسه یرك:
- عتیقه چی دوستوم ایدی!- دئمیش
قیمت لره نظارت
بایرام قوناغی پوسته لره ال اوزادینجا، ائو یییه سی:
- پوسته اوتوز مین اولدو، آللاه دؤولتدن راضی اولسون نظارتی اولماسایدی قیرخ مینه ده آلا بیلمزدیم- دئمیش.
قوناق پوسته لردن بیر سیخیم گؤتوره رك اونایلامیش:
- هه ! آللاه دؤولتدن راضی اولسون ، اون مین وئردیم تاكسی منه بورایا گتیردی. نظارتی اولماسایدی اون بئش مینه ده گله بیلمزدیم.
امكلی وئرن بایراملیغین صیفرلرینی سایمازلار!
7 یاشلی نوه ، بایراملیق آلاركن بیر پولا بیر77 یاشلی بؤیوك باباسینا باخیب دئمیش:
- بؤیوك بابا ، ائله بیل تورم دن خبریز یوخدور!
بؤیوك بابا نوه سی نین باشینی تومارلایاراق :
- اوغلوم، منیم خبریم وار ائله بیل دؤولتین خبری یوخدور!
ایبیشین بایرام گؤروشو
میللت وكیلی ایبیش بایرام گؤروشو اوچون داناباش كندینه گئدیب گئجه نی یولداشی قیبیش گیلده قالمالی اولور. گئجه یاریسی توالئته گئدملی اولان ایبیش، قاپی آغزینداكی كؤپكی گؤرونجه اوتاغا دؤنوب گولو تورپاغی ایله چیخارداراق گولدانین تركینه سیچیر .
اون بئش گون سونرا ایبیش تهراندان قیبیشا تئلفون آچاراق حالینی سورشماق ایسته ییر. قیبیش حیرصلی-حیرصلی :
- كئف احوالی بوراخ، دئ گؤروم هارا سیچمیسان،سن گئدندن، گونده ائوین بوتون اثاثلارینی ایئشیگه تؤكوب یویوب آرتیلاییریق گئنه پوخون ایگی كسیلمیر!
یئنی مودئل ار
ایبیشین باجیسی، هر ایل باشی ائوی نین بوتون اثاثلارینی دگیشدیریب یئنی موداسینی آلاردی. بایرامدان بایراما باجی گؤروشونه گئدن ایبیش بو كره یانیلیب قونشونون زنگینی باسیر. قاپی آچیلیب كوركن لری نین یئرینه غریبه بیر كیشی ائشیگه چیخیر. ایبیش بارماغینی دیشله یرك دئییر:
- آمان آللاهیم ، باجیم بو ایل ارینی ده دگیشیب!
بایرام قوناقلاری
اوشاق بایرام قوناغیندان سوروشور:
- باغیشلایین سیز هاچان گئده جك سیز؟
- نئجه مگر؟!
- هئچ، آنام دئییر قوناق گئدندن سونرا شامیمیزی یئیه جه ییك .
بؤلوم: حیكایه و گولمه‌جه‌لر
+0 به‌ین
آدم- ین گونده لیكلری
یازان : مارك تواین
كؤچورن : دوكتور جئری
بیرینجی بؤلوم
اویاندیغیمدا یالقیز دئییلدیم آرتیق. اوزون ساچلی بیر یاراتیق تاپیلمیشدی یانیمدا.
سود گونو
او درین یوخویا دالدیغیم سیرادا باشیما بیر اویونلار گلمیش اولمالی. كؤكسومون سول یانینداكی یارا ایزیندن آنلاییرام بونو. آغری – ماغری یوخدور آنجاق یئنی یاراتیغین داها ایلك اورتایا چیخیشییلا بئله بیر یارا ایزی بوراخماسی، موتلو اولایلاری گؤزله مه جگیمی گؤستریر.
دوز گونو
.............
آردیندا اوخویون
بؤلوم: حیكایه و گولمه‌جه‌لر
+0 به‌ین
نه پیس نه یاخشی!
دوكتور جئری
كوچه ده گئدیردیم بیری آرخادان سسله دی.
- دوكتور.. دوكتور!
دؤنونجه، اسكی قونشوموز پروفسور نصرالدینی گؤردوم. " آللاه ائله سین سحرین بو واختیندا بورج-مورج ایسته مه سین " – گئچدی اورگیمدن،
- اوووه .. خوش گؤردوك نصرالدین بیگ! هارالاردان بئله؟- دئدیم.
- واللاه دوزونو ایسته سن بیرینی آختاریدیم بیرآز دردله شم سنی گؤردوم- دئدی.
بیر قهوه خانایا گئچیب اَیلشدیك. پروفسور گؤزونو قاباغینداكی چایا زیلله یرك سؤزه باشلادی:
- گئچنلرده یاز گلیر دئیه ائوین بوتون اسكیمیش اثاثلارینی ائشیگه تؤكوب تزه سینی آلدیم
دئدیم : نه یاخشی!
دئدی: یاخشی دا دئمك اولماز، چونكو آتامی دا قوجالار ائوینه گؤندریم.
دئدیم : نه پیس!
دئدی: پیس ده اولسا عوضینده تزه بیر آرواد آلدیم!
دئدیم: نه یاخشی!
دئدی: یاخشی ایدی آمما ننه سینی ده اؤزو ایله بیرگه ائویمه گتیردی.
دئدیم : نه پیس!
دئدی: پیس ده دئییلدی چونكو آیدا رحمتلیك اری نین بیر میلیون تومن حوقوقونو آلیردی.
دئدیم : نه یاخشی!
دئدی: یاخشیلیغی باشینا دگسین! قیتمیرین بیری ایدی قیران خرجله میردی!
دئدیم : نه پیس!
دئدی: پیس ده اولسا گئدیب آتامی قوجالار ائویندن چیخاردیب اونونلا ائولندی.
دئدیم : نه یاخشی!
دئدی : یاخشی اولدو آمما، ***الاماغا ائو تاپمایینجا گلیب منیم ائویمه یئرلشدیلر.
دئدیم : نه پیس!
دئدی: پیس اولسادا یئنه آتاملا بیرلیكده اولدوق.
دئدیم : نه یاخشی !
دئدی: یاخشی دا اولمادی ؛ آتاملا آروادیم یولا گئتمه ییب گونده داوا – دالاش ائدیردیلر. آروادیم دا آتامین اوزوندن كبینینی ایجرایا قویوب حیطیمی الیمدن چیخارداراق بیزی ائشیگه اؤتوردو.
دئدیم : نه پیس!
دئدی: پیس اولسادا ، آللاه عوضینده سن كیمی یاخشی دوستلاری مندن اسیرگه مه ییب .
دئدیم : نه یاخشی!
دئدی: البتته یاخشی دیر دوكتور! ایجازه وئرسز ائو ***ایه ائده نه دك آتام، آتامین آروادی و من بیر نئچه گون سیزه قوناق اولاق !
ایسته دیم دئیم،" نه پیس!" دیلیم دیشیمه دولاشیب قند بوغازیما آتلاندی...
بؤلوم: حیكایه و گولمه‌جه‌لر
+0 به‌ین
كؤپك اوغلولار ایبیشی مجلیسه گؤندردیلر!
دوكتور جئری
كؤپك اوغلولار ایبیشی مجلیسه گؤندردیلر!
صاندیقلار، داناباش كندی نین والی لیگینه توپلانیب رای لر ساییلماق اوزه ره ایدی. میللت وكیلی آدایلاری سیرا ایله اوتوروب جینقیرلارینی بئله چیخارتمیردیلار. سولوقلار سینه لرده گیزلنمیشدی. بیرینجی صاندیق آچیلدی. سایان بیرینجی رایی چیخاردیب آدایلارا گؤسته ره رك اوخودو:
- خودوش!
ایكینجی ، اوچونجو و دؤردونجو رای لرده اوخوندو:
- خودوش!
ایبیشین رنگی قاچدی . دیل دوداغینی گمیرمگه باشلادی. آز قالا آرانی قاتاجاقدی. بئشینجی رای اوخوندو:
- كؤپك اوغلو!
ایبیش صندلیندن دیكلنیب سئوینجله:
- منی دئییر...- دئدی.
خودوش داشلاندی.
- بو اولا بیلمز...
- نئجه اولا بیلمز ، اولمایا سن كؤپك اوغلوسان؟!
خودوش، " یوخ " دئیه سوسدو. بو كز كؤپك اوغلولار سیرایا دوزولدو. ایبیشین چیچگی چاتلاماقدا ایدی. كؤپك اوغلولارین آراسیندا هردن آت اوغروسو ، فیریلداقچی، یالانچی، بویاقچی ، قیدی، اینك، كوچو- كوچو كیمی آدلار چیخسادا ایبیش آیاغا قالخیب وار گوجو ایله حاققینی ساوونوردو.
ساییملار سونا ائردی. ایبیش رای لرین یوزده دوخسانینی باشاریلا قازانمیشدی. ایكی نفر خودوشون قولتوغونون آلتینا گیریب اونو ائشیگه چیخارتدیلار. او باییلمیشدی...
ایبیش مجلیس یولوندا
سئچكی لری قازانان ایبیش ، ساییملاردان سونرا اؤزونه دوموك اولوب چوخ آز گؤرونوب قونوشوردو. چوخلو یالوار یاخارلاردان سونرا خبر آژانس لاریندان، تكجه جئری نیوزا بیر نئچه دقیقه واخت آییرا بیلدی.
جئری نیوز:- داناباش خالقی دئییر، ایبیشین ائششگی كؤرپودن گئچیب اونا گؤره كیمسه نی سایمیر. بو دوغرودور؟
ایبیش پچیلداییر:- یوخ!
جئری نیوز:- سیز دونننه دك قجله بئینی یئنلر كیمی گور- گور اؤتوردوز، ایندی نییه سسیز چیخمیر؟
ایبیش:- من بوتون فریادلاریمی ساخلامیشام مجلیسه گئدندن سونرا آمریكانین باشینا چكم . بونا گؤره ایندی دن سسده قناعت ائدیرم.
جئری نیوز: - سیز سئچكی لردن قاباق سؤز وئرمیشدیز سئچیلسز، گونده مجلیسده ایستیكبار جهانی نین آغزینا یومورق ووراسیز؛ ایندی سؤزوزون اوستونده سیز؟
ایبیش: - بیلدیر یوخ اینیشیل ، بیر توققوشمادا یوموروغوم خودوشون آغزینا دگیب اوچ میلیون تومن دیه وئرمه لی اولدوم. بو اوزدن ایستیكباری جهانی نین آغزینا یوموروق آتمانین خرجی اولماسا من حاضیرام هر سحر آخشام بو ایشی گؤره م... آنجاق خرجی اولسا سیز بونو منیم تبلیغاتی شوعارلاریمین حئسابینا قویون...
جئری نیوز: - سیز.....
ایبیش :- باغیشلایین ، واختیز قورتولدو؛ من گره ك ییغ- ییغیش ائله یم. دؤرد ایل سونرا گلیب سیزی گؤرمه سم حاققیزی حالال ائدین.
جئری نیوز:- حالال خوشوز اولسون!
ایمامزادا صاندیق!
موللانصرالدین والی لیگه گئدیب باشینی رای صاندیغینا دایایاراق یالوار- یاخارلا،" یا ایمامزادا صاحیبی" دئیه حاجت ایسته ییردی.
اورداكیلار:- موللا ، یانلیش گلیب سن؛ ایمامزاده بیر خیابان آشاغیدادیر!- دئدیلر.
موللا گؤزلری نین یاشینی قولو ایله سیله رك دئدی:
- سیز یانیلیرسیز؛ گئرچك ایمامزادا بوراسی دیر! بو بؤیوكلوكده مؤجوزه نی گؤرمورسوز؟ خودوشو سالمیشیق بورایا ایبیش چیخیب دی!
داناباشین فرماندارلاری!
ایبیش سئچكی لری قازانینجا ، ایكی نفر تبلیغاتچیسی دعاوا- دالاش ائده- ائده اونون قاپیسینا گئدیریلر.
ایكیسی بیردن : - آغایی ایبیش ! اؤزون دئمه دین چیخسان منی داناباشین فرمانداری ائده جكسن؟
ایبیش گولومسه یرك دئدی :
- بو مسئله نی اؤزوز بیر جوره یولونا قویون ؛ او بیری فرماندارلاریم گلسه لر سیزه فرمانداری نین آبدارخاناسیندا دا یئر قالمایاجاق!
بؤلوم: حیكایه و گولمه‌جه‌لر
+0 به‌ین
ایبیش- ین تبلیغاتی
دوكتور جئری
سیاسی بیلینجین آزلیغی
میللت وكیلی آدایی ایبیش، داناباش كندی نین مسجیدینده دانیشیغینی قورتاریب ائشیگه چیخدیغیندا باشماقلاری نین اوغورلاندیغینی آنلاییر. قیزقین – قیزقین داناباشلی لارا :
- باخین میللت لرین سیاسی شعورو(بیلینجی) بو كیمی یئرلرده بللی اولور، آیری اؤلكه لرده میللت وكیل لرینه باشماق تولازلاییرلار، بیزیمكینده ایسه باشماقلارینی اوغورلاییرلار!
سیجاق قارشیلاما
یوخاری داناباش كندیندن اولان میللت وكیلی آدایی ایبیش، تبلیغات اوچون آشاغی داناباشا گئدیر. آشاغی داناباشلی لار، ازیك بامادور و لاخ یومورتا ایله اونو قارشیلایینجا اؤزونو سیندیرماییب گولومسه ییرك دئییر:
- سیز هاردان بیلدیز منیم اومئلئت دن خوشوم گلیر؟!
یالان قیتلیغی
دانا باش كندی نین مسجیدینده ،میللت وكیلی آدای لاری سیرا ایله گلیب گؤره جكلری ایشلردن دانیشیردیلار. نوبت ایبیشه چاتیر. او میكروفونون آرخاسینا گئچینجه سؤزون اوجو الیندن چیخیب بیر سوره هوروت- هوروت خالیقین اوزونه باخیر.
داناباشلی لاردان بیری:
- آغایی داناباشلی نییه دانیشمیرسیز؟ - دئیه سوروشور.
ایبیش اوزونتو ایله یانیتلاییر:
- واللاه، عاغیلا چاتان هر نه قدر یالان وار ایدی بو قارداشلار سؤیله دیلر منه بیر شئی قالمادی!
مجلیس یوخسا پارلامئنت ؟!
میللت وكیلی آدایی ایبیش، داناباش كندی نین آزاد دانیشگاهیندا سوركلی اولاراق مجلیس یئرینه پارلامئنت سؤزونو ایشله دیردی. اؤیرنجی لردن بیری، بونون ندنینی سوروشونجا او دئدی:
- میللت ائوینه ، پارلامئنت سؤزو مجلیس دن داها اویغون گؤرونور چونكو مجلیسه یول تاپان هر میللت وكیلی بیر ایكی آیین ایچینده پارلاییر، نومونه سی سیزین گئچمیش میللت وكیلیز خودوش ، ائششگی ایله مجلیسه گئتدی ایكی آیا سونرا پرشیا ایله قاییتدی.
بؤیوك ایش!
داناباشلی لار، توالئتین آزلیغیندان میللت وكیلی آدایی ایبیشه شكایت له نیرلر. ایبیش قاشلارینی چاتاراق خالقا دئییر:
- سیز منی مجلیسه گؤندرین؛ سؤز وئریم داناباشین باشا باشینی توالئت ائله یم.
غئیبی ایمداد
میللت وكیلی آدایی ایبیشی مسجیددن چیخاندا بارماق ائله ییرلر. او دؤنوب كیمسه نی گؤرمه یینجه، اللرینی گؤیه قالدیراراق دئییر:
- آللاهیم سنه مین شوكور، ایمدادهایی غئیبینی صحنه یی انتخاباتدا دا بیزدن اسیرگه میرسن!
انتخاباتین شور و نشاطی!
داناباش كندی نین گئچمیش میللت وكیلی خودوش ایله میللت وكیلی آدایی ایبیش دانا تی وی ده تارتیشیردیلار. خودوش بارماغینی ایبیشه ترپه ده رك دئییر:
- بللی دئییل " شورای نگهبان " نئجه سیزی انتخابات صحنه سینه بوراخیب ائشیتدیگیمه گؤره سیز جاوانلارین آراسیندا ائكستازی قورص لاری پایلاییرسیز.
ایبیش دریندن بیر سولوق آلاراق یانتیلاییر:
- اولن ، من گؤز – گؤز ائله دیم نگهبان توالئته گئدنده صحنه یه وارید اولدوم. ایكیمجن، دئدیگیز قورص لاری پایلاماقدان مقصدیم انتخاباتا شور و نشاط گتیرمكدیر...
هاله یی نور!
قبیش ، میللت وكیلی آدایی ایبیش دن سوروشور:
- دونن گئجه، مسجیدده دانیشاندا اطرافیندا نور هاله سی كیمی بیر شئی گؤردوم. او نه ایدی؟
ایبیش اوزگون – اوزگون باشینی ترپه دیب دئییر:
- بیزده او شانس باشیمیزا هاله یی نور دولانا؛ بیلمیرم هانسی كؤپك اوغلی كؤپك جیبیمه یانیق سیگار آتمیشدی!
یا مجلیس یا زیندان!
میللت وكیلی آدایی ایبیش دن سوروشورلار مجلیسه گئده بیلمه سن نه ائدجكسن؟
دئییر: - مجلیسه گئتمه سم زیندانا گئده جم.
- نئجه ؟
- هئچ ... كابابچی، چاپخاناچی و تالارچیلار چك لریمه برگشت ووراجاقلار.
بؤلوم: حیكایه و گولمه‌جه‌لر
+0 به‌ین
بویاقچی آدای
دوكتور جئری
كؤنلومه كاباب دوشموشدو. میللت وكیلی آدایلاری نین ، رای قازانماق اوچون كاباب قوناقلیغی وئردیكلرینی ائشیتمیشدیم . اؤز- اؤزومه دئدیم :
- گئدیم گؤروم بیزیم بو ایبیش تبلیغات ایشینی هارا چاتدیریب بلكه ده كاباب اوستونه چیخدیم.
ایبیشین دفتری نین قارشیسیندا تاكسی دان ائنینجه، اونو وانئت دن بویاق قوتوسو بوشالتماقدا گؤردوم.
- خوش گؤردوك ایبش بَی ! نه قاییریرسان اَشی ؟- دئدیم
- اوووه .. بیزده سنی خوش گؤردوك آاا ..دوكتور ! تام زامانیندا گلمیشسن ، كؤمكلیك ائله بویاقلاری دفتره داشییاق، منیم بئلیم آغریییر- دئدی.
زیققانا- زیققانا قوتولاری ایچری داشیركن سوروشدوم:
- بویاقلاری نئیله ییرسن ؟ تبلیغات اوچوندورمو؟...
- یووووخ! بونلارلا دوشمنلرین ساواشینا گئده جَگم...
شاشیردیم دوغروسو.
- اولمایا بویاق قوتولاریندا پارتلاییجی ماده وار، رقیب لرینی می اؤلدورمك ایسته ییرسن ؟!
یئنه یوووخ دئین ایبیش، بویاق قوتولارینی ، دفترین بیر بوجاغیندا اوست اوسته قالادیقدان سونرا چاینیكی الیمه وئریب ائكله دی:
- اوّل گئت وانئتچینی یولا سال ، سونرادا بونو قارشیداكی قهوه خانادان دولدور، اوندان سونرادا گل دئیم بونلارلا نئیله یه جگم.
جیب لریمی وانئتچی ایله قهوه خاناچی نین اتگینه بوشالتدیقدان سونرا دفتره قاییتدیم. ایبیش هره میزه بیر چای سوزدو. ماراقلا دانیشیغین آردینی توتدوم:
-هه دئییردین، سانكی فیرچا- بویاقلا دوشمن ساواشینا گئده جكدین؟
ایبیش قندی آغزینا آتیب چایی ایچه – ایچه :
-مسئوللارین دئدیگینه گؤره، دوشمنلر میللتین حوضورونو انتخاباتدا "كمرنگ" ائتمك ایسته ییرلر. بونا گؤره، منده بو بویاقلارلا "كمرنگ" اولان یئرلری " پُررنگ " ائدیب دوشمنلرین آرزوسونو گؤزونده قویماق ایسته ییرم.
ساتاشاراق دئدیم:
-گؤزله چوخ "رنگلی " اولماسین الینه ایش وئره رسن ها!
ایبیش گولومسه یَرك دئدی:
-یووو... قورخما بیز آتا بابادان بویاقچی دونیایا گلمیشیك رنگلرین اؤلچوسونو یاخشی بیلیریك.
بوم- بوز اولموش چاییمی میزین اوستونه بوراخالی آیاغا قالخدیم. ایبیشده آیاغا قالخیب یولو گؤستره رك:
-به هارایا؟ هله تزه اگلشمیشدیك ؛ دوغرودان دئمه دین نه یاخشی بویانلاردان؟
-هئچ ، كاباب ایگینه گلمیشدیم ، گؤردوم ائششك داغلاییرلار! – دئییب دفتردن ائشیگه چیخدیم.
12/11/1390
بؤلوم: حیكایه و گولمه‌جه‌لر
+0 به‌ین
بیر آزدا بیز اَییلمیشیك!
دوكتور جئری
بالانصرالدین یئنه آتاسی سورغویا توتموشدو:
- هئچ اولارمی آزینلیق چوخونلوغون چاناق – بوشقابینی دامدان یئره تؤكسون؟
- اولار اوغلوم اولار! - دئیه موللانصرالدین باشی ایله ده اونایلادی.
- هئچ اولارمی آزینلیق چوخونلوغون آغزینا قیفیل وورسون ؟
-اولار اوغولوم اولار!
- هئچ اولارمی آزینلیق چوخونلوغو هایانا ایسته سه سورسون؟
- اولار اوغلوم اولار!
- اولار، اولار ، دئییرسن آتا، آخی نئجه اولار؟
موللا، پروفئسوری ساققالینی تومارلایاراق:
- اوغول! من دئییرم اولار سنده دئ اولار!
- آخی نئجه؟
موللا كؤكسونو آریتلادیقدان سونرا:
- گئچنلرده "زینب باجیلاری" بیر كیشی ایله قادینی اؤپوشمك سوچونا ، محكمه یه گتیرمیشدیلر. قادین ایدیعا ائدیردی كوچه ده گئدركن كیشی اونا سؤز آتیب سونرا ایسه اونو اؤپوبدور. قادیندان سوروشدوم :
- بو آغانین نردیوانی وار ایدی؟
- یوخ!
- بو آغا چارپایه گتیرمیشدی؟
- یوخ !
بو یانیتلاری ائشیدینجه شاشقینلیقلا :
- خانیم! ماشاآللاه سیزین ایكی مئتر بویونوز وار؛ یانیندا نردیوان ، چارپایه سی اولمایان بو بیرمئتریاریم آغا نئجه سیزی اؤپه بیلدی آخی؟
قادین گؤزلرینی سوزه رك:
- بو آغا آیاقلاری نین اوجونا قالخدی بیر آزدا من اَییلدیم! – دئدی
بالانصرالدین سؤزه آتلاندی:
- سونوندا نئجه اولدو؟!
- كیم ، چوخونلوقلا آزینلیق؟
- یوخ قادینلا كیشی؟
- هئچ! او راضی بو راضی نه غلط ائله سین قاضی ؛ بوراخدیم گئتدیلر.
بؤلوم: حیكایه و گولمه‌جه‌لر
+0 به‌ین
دولار ایله ریال
دولار ایله ریال بازاردا گؤروشورلر. دولار بیغ آلتی گوله رك ریالا ساتاشیر:
- ریال قارداش! آللاه یامانلیق وئرمه سین نییه رنگین سارالیب، اولمایا تیریق – میریغا دوشموسن؟
ریال دریندن بیر آه چكیب دئییر:
- دردیمی دئشمه دولار قارداش حالیم بتر یاماندی، بیر كیلو مینلیگیمه یاریم كیلو سوزو ( سبزی- گؤی) وئرمیرلر!
دَییش توققوش
قوزو قولتوغوندا بیر كندلی، داواخانایا گیریب نوسخه سینی دوكتورا وئریر. دوكتور نوسخه یه باخمادان گولومسه یه رك:
-عمی ! مال- داوار داواخاناسی ایكی توكان آشاغیدادیر یانلیش گلمیسیز- دئییر.
پرت اولان كندلی:
-نوسخه قوزونون نوسخه سی دئییل منیم نوسخه م دیر. بازارچیلارین ریالا جینس وئرمه دیكلری اوچون بو قوزونو گتیرمیشم داوالارلا دَییش توققوش ائله یم!
ریالین انگی
ریال یامان خسته لنمیشدی. یولداشلاری؛ دولار، یورو و لیره حالینی سوروشماغا گئدیرلر. ریال نفس وورا - وورا قویودان چیخان سسی ایله میزیلداییردی :
-دولار مین تومن اولاجاق؛ دولار مین تومن اولاجاق...
دولار ، الینی ریالین آلنینا قویوب سونرا اؤزونتو ایله دئییر:
-انگینی چكین ساییر باییر ائله ییر!
ریالی قورتارماغین یوللاری
مجلیسده ریالین دگری نین الدن وئرمه سی نین قاباغینی آلماق اوچون جلسه قورولموشدو. میللت وكیللری اؤنریلرینی سونماقدا ایدیلار.
بیرینجی میللت وكیلی : منجه، ریالی دوندوروجویا قویوب ایندیكی دگرینی دوندورمالی ییق.
ایكینجی میللت وكیلی : یوخ ! بو اولاسی دئییل ، بیز گره ك دولارین دگری نین آرتماسی نین قاباغینا شاتیر اوزاداق.
اوچونجو میللت وكیلی : قارداشلار! اؤنریلرینیزه سؤز اولا بیلمز آنجاق خاریجه دن دوندوروجو و شاتیر آلماق اوچون یئترینجه دولاریمیز یوخدور بونا گؤره بو دورومدا هامیمیز باشیمیزی كهلیك كیمی قارا سوخساق یاخشی دیر.
بوتون میللت وكیللری هامیسی بیرلیكده : دوغرودور ! دوغرودور!....
مجلس باشقانی : اوی بیرلیگی ایله اوچونجو میللت وكیلی نین اؤنریسی اونایلانیر.
بؤلوم: حیكایه و گولمه‌جه‌لر
+0 به‌ین
میللت وكیل لری احوالاتی
دوكتور جئری
لالجا
ایبیش میللت وكیلی آدایی اولماق ایسته میش . آد یازدیرماق اوچون والی لیگه گئتمیش . سوركلی توركجه قونوشدوغونو گؤرن اورداكی لار:
-قارداش! بونو بیل مجلیسده توركجه دانیشا بیلمزسن ها! - دئمیشلر اونا.
ایبیش گولومسه یه رك :
-سیز منیم آدیمی یازین سؤز وئریرم چیخسام ، مجلسده لال اولام!- دئمیش.
بیر آللاه بیلیر
سئچیملر یاخینلاشینجا ، میللت وكیلی آدایی ایبیش، بیر قونوشما متنی حاضیرلاییب داناباش كندی نین مسجیدینه گئدیر. میكروفونون آرخاسینا گئچینجه قونوشما متنی نین ایتیلدیگینی آنلاییب خالقا سسله نیر:
-داناباش كندی نین هوشلو باشلی اهالیسی! بورایا گلمه میشدن اؤنجه سیزه وئرجگیم وعده لری بیر من ، بیر آللاه بیلیردی آنجاق ایندی بیر آللاه بیلیر!
مجلیسه بیمه اولماق!
كئچمیش دؤوره لرین مجلیس وكیلی بو كز، اؤزونه ولیعهد سئچن شاهلار كیمی، اوغلونو میللت وكیلی اولماغا حاضیرلاشدیردی. اوغول آتادان سوروشور:
-آتاجان باغیشلایین! مجلیسده لایحه لره نئجه رای وئرمه لی یم؟
آتا قاشلارینی چاتاراق :
-مجلیسده كورسونو عؤمورلوك اولاراق قوروماق ایسته سن ، لایحه لرین تصویبینده اكثریت الینی گؤیه قالدیراندا سنده قالدیر اكثریت الینی آشاغی سالاندا سنده سال !
اللری آغریماسین
مجلیس سئچیملری یاخینلاشینجا ، میللت وكیلی آدایی ایبیش داناباش كندی نین اهالیسینی چیلووكابابخانا قوناق ائله ییر. چیلووكابابی یئییب ائشیگه چیخانلار بیربیرلرینه :
-كابابچی نین اللری آغریماسین چوخ یئمه لی پیشیرمیشدی- دئییرلر.
بو سؤزلری ائشیدن ایبیش خالقا سسله نیر:
-بس منیم اللریم!
كسرلی تبلیغات
میللت وكیلی آدایی ایبیش تبلیغات لاری نین آشاغیسیندا یازمیشدی:
- چیلووكابابیمی یئییب رقیبه رای وئرینلرین بورنوندان گلسین
"كاباب چیلار گونو" قوتلاماسی
مجلیس سئچیملری نین گلیب چاتماسی بوتون كابابچی لارا موبارك اولسون
كابابچی لار اتحادیه سی
میللتی سئویندیرمه
قبیش اوتوبوس شوفئری ایمیش . بیر گون یئنی سئچیلمیش میللت وكیل لرینی مجلیسه آپاریرمیش. میللت وكیل لری گؤره جكلری ایشلردن دانیشماغا باشلامیشلار.
بیرینجیسی : من ایش تؤرتمكله 5 میلیون ایشسیزین اورگینی سئویندیره جگم .
ایكینجیسی : من اعتیادین كؤكونو قازماقلا 15 میلیون معتاد عائله سینی نین اورگینی سئویندیره جگم.
اوچونجوسو:من ائوسیزلره ائو تیكمكله20 میلیون ائوسیزین اورگینی سئویندیره جگم.
...
بو سس- كوی و گوپلاردان حیرسلنمیش قیبیش، آیاغینی قازا باساراق قیشقیرمیش:
-منده اوتوبوسو دره یه سورمكله 75 میلیونون اورگینی سئویندیره جگم....
بؤلوم: حیكایه و گولمه‌جه‌لر
+0 به‌ین
برق ، سئچكی و لامپا پوفله مه
دوكتور جئری
مشروطه انقلابییندان قاباق برق یوخ ایدی چونكو مجلس یوخ ایدی. مجلس اولسایدی ، خالق نوماینده سئچیب مجلسه گؤندرمكله ، مركزدن برق ایمتیازی آلابیلردی ؛ نئجه كی ایندی بیز نوماینده لرمیزین قول- بیلگی نین گوجونه دؤولتدن سو ، برق ، گاز و یا كارخانا ایمتیازلارینی قوپاردیریق.
او قارانلیق دؤنمده ، داناباش كندینده دؤولت خانیم آدلی بیر قاری ایله اوغلو یاشاییردی. دؤولت خانیم، ائو – ائشیگین بوتون ایشلرینی اؤزو گؤره ردی آنجاق گئجه ، یئرلری سالیب یاتماق واختی گلنده اوغلونا دئیردی:
-آی آغیللی بالام! دور لامپانی پوفله .
اوغولون دوداغی میریق ایدی. بو اوزدن پوفله مكده زورلوق چكیردی . او چوخلو پیرتا-پیرتدان سونرا گیلئیله دؤولت خانیما دئیَردی:
-باشینا دؤندوگوم آی گول اوزلو ننه ! سن نییه هرنه چتین ایش وار منه دئییرسن!...
....
بو حیكایه دن ایللر اؤتدو. مشروطه انقلابی اولدو. مجلس یاراندی. برق گلدی. آیدینلیق دؤنمینده ، دؤولت خانیم، ائو- ائشگین ایشلرینی آرتیق اوغلونا تاپشیرمیشدی .تكجه دئییردی:
- او ایشی گؤرمه ، بو ایشی گؤر؛ اورایا گئتمه بورایا گئت؛ اونو گئیمه ، بونوگئی؛ اونا باخما ، بونا باخ؛ اونو اوخوما ، بونو اوخو ؛ اونو یازما ، بونو یاز؛ اونو یئمه بونو یئه ....
برقین گلیشیندن، اوغولون جانی لامپا پوفله مكدن قورتولموشدو آنجاق جمهوری مشروطه یی مشروعه نین ایلكه لریندن بیری سئچیب – سئچیلمه زورلوغو ایدی. سئچكی لرین سیراسی گلنده دؤولت خانیم او- بو ائله مه دن اوغلونا دئییردی:
- آی آغیللی بالام! دور نوماینده نی سئچ!
جانینا لامپا پوفله مه قورخوسو دوشن اوغول رنگ آلیب رنگ وئره رك گیلئیله آناسینا :
-آی گول اوزلو ننه! سن نییه هر نه چتین ایش وار منه دئییرسن!...
بؤلوم: حیكایه و گولمه‌جه‌لر
+0 به‌ین
ننه - دده سیز چیلله!
دوكتور جئری
گئجه دیر. یاشلی لار ائوی نین بوروسوندان كفنسی توستو توتمكده دیر. قوجالار میزین اوستونده كی قارپیزا گؤز تیكه رك چیلله آنی لاریندان دانیشیرلار؛ كورسو باشی نین سیجاقلیغی ، خان ننه نین ناغیلی، بؤیوك بابانین قارپیز كسمه سی ، یئر- یئمیشلرین قاپان قاپیشی ، اوشاقلارین قهقهه سی...
آنی لار گؤزلرده اولدوزلاشیر . بیردن یاتاقخانانین قاپیسی گورولتو ایله آچیلیر. گؤزلر قارپیزدان قاچیر؛ گئچمیش ایندی له شیر.
-گلن كیمدیر؟- گئچیر اوركلردن - اوغول ، قیز یوخسا تورونلار؟
- یابانجی دئییل تانیش دیر...- دئییر عزرائیل ..
قوجالار بیر- بیرلری نین اوزونه باخیرلار.
عزرائیل گولومسه ییر :
-شئی!... قارپیزین جانینی آلماغا گلمیشدیم بو كره...
1390.9.29
آنی : خاطیره
تورون : نوه
بؤلوم: حیكایه و گولمه‌جه‌لر
+0 به‌ین
" پان" – لار دونیاسی!
دوكتور جئری
موللانصرالدین، بالانصرالدینین قولتوغونداكی كیتابی گؤستَره رك سوروشور:
- توركجه كیتاب اوخویورسان؟! اولمایا سنده پان توركیست اولوبسان؟
- نه دخلی وار آتاجان ؟ باخین سیزده فارسجا قزئت آلیب سیز، بئله ایسه سیزده پان فارسیست سیز...
موللانصرالدین گولومسه ییر:
-یوخ اوغول! من پان فارسیست دئییلم، قزئتی یالنیز شوشه لری سیلمك اوچون آلمیشام.
بؤلوم: حیكایه و گولمه‌جه‌لر
+0 به‌ین
محرم لیک احوالاتی
دوکتور جئری
شبئه
ایبیش مسجیدین پنجره سیندن ایچری باخیر. قیبیش ماراقلا سوروشور :
- نه خبردی؟
- شبئه وئریرلر.
قیبش - گئچ اویانا منده باخیم - دئیه پنجره یه دیرماشیر.
- بونلار کی سینه وورورلار!
- غش ائله ینلری گؤرمورسن می؟
گولمجه لرین قالانینی آردیندا اوخویون
بؤلوم: حیكایه و گولمه‌جه‌لر
+0 به‌ین
موسلمان !
جماعت ، مسجیدده نامازینی قیلیب دوعا ائتمكده ایمیش . بیردن الینده زنجان پیچاغی اولان بیر آدام ایچری گیریب گور سسله :
-آرانیزدا موسلمان وار می؟ دئیه باغیرمیش.
جماعت، الی پیچاقلی آدامدان برك قورخموش . آما ایچلریندن یاشلی بیریسی جسارتینی توپلاییب هر شئیی گؤزه آلاراق الینی قلدیرمیش:
-من... من موسلمانام.
آدام بونو ائشیگه آپارمیش. دئمه قوربان كسدیره جكمیش. قوربانینی یاشلی آداما كسدیرمیش آما آدام یاشلی اولدوغوندان تئز یورولموش. من یورولدوم اوغلوم، دریسینی ده باشقاسی سویسون دئمیش. قوربان صاحیبی آدام یئنه مسجیده قاییتمیش، بو سفر زنجان پیچاغینی قانان بویانمیش گؤرن جماعت یامانجا قورخموش . آدام:
-آرانیزدا باشقا موسلمان یوخ مو؟ دئیه باغیرمیش.
او آندا هركس موللایا باخمیش. موللانین اؤدو اوزولموش دوغروسو.
-نه باخیرسیز منه ، دئمیش و ائكله میش:
-ایكی ركعت ناماز قیلدیردیق دئیه موسلمان می اولدوق؟..
بؤلوم: حیكایه و گولمه‌جه‌لر