+0 به‌ین
چَوَل اوغلانین دوز یئریمه‌سی
دوکتور جئری
دوکتورلار بیناسی‌نین قاباغیندا کیشی باغیر-باغیر باغیریردی:
- ائوین ییخیلسین دوکتور جئری، قاپین باغلانسین دوکتور جئری، نئجه بیزی بدبخت ائله‌دین؟!
کیشی‌نین باشینا ییغیشان جاماعاتین آراسیندان بیری سوروشدو:
- عمی جان نولوب؟
کیشی‌نین دردی دئشیلدی:
- اوغلوم احمد آنادان اولما چَوَل ایدی. ائله بو بینا‌نین قاباغیندا کاغیذ دسمال ساتاردی. ماشاللاه گونده بئش یوز مین تومنه پول دئمزدی. هم اؤزونه همی بیزه یئتیشردی. ووردو بیلدیر بو ائوی ییخیلمیش دوکتور جئری گیردی اوغلوم جیلدینه گل سنی پولسوز عمل ائله‌ییب آیاق‌لارینی دوزلدیم. اوغلوم بیرآز قوش‌بئیین‌دیر. تئز بئینینه باتدی. گلیب منه دئدی، ایللاه-بیلاه آیاق‌لاریمی عمل ائده‌جگم. نه قدر دئدیم، اوغول بو دوکتورلار آللاه خاطیرینه سنی موفته‌سینه عمل ائله‌مزلر. بونلار ایسته‌ییرلر سنی آزمایشگاه سیچانی ائله‌‌سینلر. ایندی چَوَل- چَوَل یئریییرسن. صاباح عمل ائله‌ییب شیکست اولارسان ها! بئینیه باتمادی کی باتمادی...
جاماعاتین آراسیندان بیر خوش گئیینیشلی کیشی قاباغا گلدی:
- سونرا نئجه اولدو؟ اوغلوز شیکست اولدو؟ من وکیلم؛ ایسته‌سز سیزی پولسوز مودافیعه ائدیب بو دوکتورون دده‌سینی یاندیرارا بیله‌رم.
کیشی اوزونتو ایله باشینی توولاییب دئدی:
- یوخ.. اوغلوم عملدن سونرا دوزلیب دوز-دوز یئریمگه باشلادی، حتی آخشام‌لاری باشگاها گئدیب فوتبال دا اویناییردی.
وکیل چاشیردی:
- بئله ایسه سیزین موشکولوز نمنه‌دیر؟!
کیشی دریندن بیر آخ چکندن سونرا آرتیردی:
- عملدن سونرا اوغلومون بازاری کاسادلاماغا باشلادی. اوغلومون قاباقکی موشتری‌لری خیابانین قارشی طرفینده‌کی بیر چولاق اوغلاندان کیبریت آلماغا باشلامیشدیلار. گونده‌لیک گلیریمیز صیفره یاخینلاشینجا چاره‌سیزلیکدن اوغلومو آپاریب صنعتی شهرجیکده ایشه قویدوم. ایندی اونا آیلیق دؤرد میلیون یاریم حوقوق وئریرلر.ایندی سیز دئیین بو جیز-ویز حوقوقلا بیزی نئجه باشیمیزی دولاندیراق؟ آللاه بو دوکتور جئری‌نین ائوینی ییخیب بالالارینی سرگردان ائله‌سین. او بیز ی بدبخت ائله‌دی...
بؤلوم: آجی گولوش‌لر